Am Samschtig 24.6.2023 isch e bunte und luschtige Huffe bi
schönschtem Summerwätter zämecho, um öppis gemeinsams z’erläbe.
E Teil dervo isch sogar e Stund früehner am Träffpunkt gsi …
Am halbi zähni am Morge sin denn au alli do gsi und dur
d’Organisadore vo dem Daag begrüesst worde. Mit em 10er Drämli hän mir uns zäme
uf die erschti Etappe gmacht, wo plötzlich e bekannti Stimm über de Lutsprecher
vom Drämli allne zäme e schöne und interessante Daag gwunsche het.
Bi dr Besichtigung vom Depot Hüslimatt (Oberwil) und dr
Leitstell vo dr BLT hänn mir alli sehr viel interessants gseh, sogar e Trämli wo
dur d’Wäschalag gfahre und gschrubbt&bürschtet worde isch. Wer dänggt het,
mir fahre die zweiti Etappe mit em 10er witer, isch gewaltig überrascht worde.
Mir sin mit em Nostalgiefahrzüg (Birseckbahn) bis zur Endstation Rodersdorf dur
e sehr erfahrene Wagefüehrer gfahre worde und es het unterwägs nätürlig au no
en Apéro gäh.
Bi dr Akunft hänn mir alli e Hüngerli gha und es het denn au
no e Stärkig geh, bi vielne luschtige und interessante Gspröch. Zum Dessert hets
e sälbergmachti und mega feini Torte vo öpperem us em Huffe geh. Mit em volle
Buch hän mir e super tolli Präsentation und Füehrig vom Verein Pro
Birsigtalbahn in dr Remise Rodersdorf dörfe erlebe.
Die ganze Erlebnis hän mir mitgnoh uf d’Rückfahrt im
Nostalgiefahrzüg bis ins Depot und dr Daag ganz individuell chönne usklinge
loh.
An dere Stell nomol e herzlichs Danggschön an alli wo do
mitorganisiert und sich beteiligt hän …
